रुस वाडाको नियम उल्लंघन गर्ने राष्ट्रको सूचीमा

एजेन्सी, मंसिर ३ । वर्ल्ड एन्टी डोपिङ एजेन्सी वाडाले रुसलाई आफ्नो नियम उल्लंघन गर्ने राष्ट्रको सूचीमा राखेको छ । रुससहित वाडाले अहिलेसम्म ६ देशलाई आफ्नो नियम उल्लंघन गर्ने राष्ट्रको सूचीमा राखेको छ ।
यसमा अर्जेन्टिना, युक्रेन, बोलिभिया, एन्डोरा र इजरायल पनि छन् । यी पाँचै राष्ट्रले आफ्नो नियम उल्लंघन गरेर गैर कानूनी काम गरेको वाडाले जनाएको छ । यस्तै ब्राजिल, बेल्जियम, फ्रान्स, ग्रिस, मेक्सिको र स्पेनलाई निगरानीमा राखिएको वाडाले जनाएको छ । आउँदो वर्षको मार्चसम्म यी राष्ट्रको विषयमा पनि निर्णय हुने वाडाले जनाएको छ । केन्यालाई भने वाडाले आफ्नो देशमा डोपिङ नियन्त्रणका लागि भएका कामको बारेमा जानकारी निर्देशन दिएको छ ।
केन्याको जवाफ चित्तबुझ्दो नभएमा उसमाथि पनि प्रतिबन्ध लाग्न सक्ने छ । डोपिङको आरोप लागेका १५ जना केन्याका खेलाडी अहिले प्रतिबन्धमा छन् ।