ओरालो लाग्यो एमाओवादीको आर्थिक कारोबार,आर्थिक स्रोतहरूको अवस्था कमजोर

काठमाडौं,पुष २६ । एकीकृत नेकपा माओवादीले आर्थिक वर्ष २०७१/७२ मा ४ करोड रुपैयाँबराबरको आर्थिक कारोबार गरेको छ । अघिल्लो आर्थिक वर्ष (२०७०/७१) को तुलनामा उसको आयव्यय ओरालो लागेको छ ।अघिल्लो वर्षको तुलनामा उसको कारोबार झन्डै ३ करोडले घटेको छ । अघिल्लो आर्थिक वर्षमा एमाओवादीले ७ करोड हाराहारीमा आर्थिक कारोबार गरेको थियो ।
एमाओवादी केन्द्रीय कार्यालयका अनुसार चालु आर्थिक वर्षमा कारोबार घट्नुमा पार्टी सदस्यहरूको नवीकरणदेखि अन्य आर्थिक स्रोतहरूको अवस्था कमजोर देखिनु मूल कारण रहेको राजधानी दैनिकमा खबर छ ।
निर्वाचन आयोगमा पार्टीको तर्फबाट बुझाउन तयार पारिँदै गरेको आर्थिक आय–व्यय प्रतिवेदन (अडिट रिपोर्ट) मा उसले आर्थिक वर्ष २०७१/७२ मा ४ करोड रुपैयाँको आम्दानी–खर्च भएको देखाएको छ । निर्वाचन आयोगले राजनीतिक दलहरूलाई पुस मसान्तसम्म आफ्नो आम्दानी खर्चको विवरण बुझाउन गरेको आग्रहअनुसार एमाओवादीले अडिट रिपोर्ट तयार पारेको हो । रिपोर्टमा अध्यक्ष पुष्पकमल दाहालको हस्ताक्षर हुन भने बाँकी छ ।
अघिल्लो आर्थिक वर्षमा एमाओवादीले ३ लाख पार्टी सदस्यबाट लेबी उठाएको विवरण निर्वाचन आयोगमा देखाए पनि यस पटकको अडिट रिपोर्टमा त्यो संख्यामा पनि कमी आएको छ । एमाओवादीले अहिले झन्डै २ लाख ७० हजार पार्टी सदस्य तथा शुभचिन्तकहरूबाट मात्रै लेबी उठाएको विवरण उल्लेख छ ।