नयाँ शक्तिका अनुहार : ग्रीन कार्ड होल्डरदेखि थाकेका र राज्यकोष लुटेकाहरुसम्म

काठमाडौं,माघ १५ । डा. बाबुराम भट्टराईले नयाँ शक्तिको अन्तरिम परिषद्मा राखेका अधिकांश व्यक्ति विगतमा विभिन्न उच्च सरकारी निकायमा रहेर मुलुकको ढुकटी दोहन गरेका व्यक्ति नै हुन् । उनीहरु विभिन्न दल चाहर्दै थाकेका, अघाएका व्यक्ति भन्दै सार्वजनिक रुमपा नै आलोचना सुरु भएको छ ।
नयाँ शक्तिका मूल अभियन्ता नै रहेका डा. भट्टराई आफैं परिक्षण भइसकेका व्यक्ति हुन् । उनले विगतमा केही राम्रा काम गरे भन्ने आधारमा उनलाई नयाँ मान्न सकिँदैन । काठमाडौं उपत्यकाको सडक विस्तारको विषयमा उनलाई निमित्त कारण मान्न सकिन्छ, त्योबाहेक सबै विभाग र निकायले त्यसमा भूमिका निभाएका थिए । भौतिक पूर्वाधार तथा यातायात मन्त्री रहेका टोपबहादुर रायमाझी र हृदयेश त्रिपाठीको भूमिका मासेर डा. भट्टराईले मात्रै सबै थोक गरेका थिए भन्ने मान्न नसकिने भन्दै धेरैले नयाँ शक्तिको उठान नै गलत र तर्क संगत नभएको बताएका छन् ।
डा. भट्टराईले गत आइतबार नयाँ शक्तिको अन्तरिम परिषद् घोषणा गरेका छन् । त्यसमा राखिएका नाम र उनीहरुको विगत र वर्तमान हेर्दा उनीहरु कुनै नयाँ अनुहार होइनन् । २०४६ सालपछि राज्यका विभिन्न निकायमा बसेर राज्यकोष दोहन गरेका, गैरसरकारी संस्था चलाएर कमाउ धन्दा गरेका र जनताको नाममा ‘वरको सिन्को पर’ समेत नसारेका व्यक्तिहरु नै रहेका छन् ।
डिभी र पिआरधारी
डा. भट्टराईले अन्तरिम परिषद् भन्दै बनाएको नयाँ शक्तिमा रहेकाहरु डिभी र पिआरधारीदेखि भारतीय चलचित्रको व्यापार गर्नेहरु रहेका छन् । यस्तै, गैरसकारी संस्था चलाउनेदेखि राज्यका विभिन्न निकायमा बसेर कमाउ धन्दा चलाएकाहरु कालो धनलाई सेतो बनाउन राजनीतिक आवरण खोजेका व्यक्ति छन् । अशोक शर्मा नेपालमा भारतीय चलचित्रको खुलाबजार विस्तार गर्न लागेका व्यक्ति हुन् । उनले नेपाली निर्मातालाई डुबाएर भारतीयहरुको ताबेदारी गर्ने गर्दछन् । काठमाडौँका ठूला भनिएका चलचित्र घरमा नेपाली चलचित्र लाग्न नदिने र लगाई हालेपनि नचलेको भन्दै उतार्न लगाउने विशेष योग्यता उनको रहेको छ ।
नायिका करिश्मा मानन्धर अमेरिकाको ग्रीन कार्ड होल्डर हुन् । उनलाई नेपालको चिन्ताभन्दा पनि अमेरिकाको नै बढी चिन्ता हुने गर्दछ । अमेरिकी नागरिकले नेपालको हितमा काम गर्छ भन्ने कुरा पत्याउन नसकिने भन्दै आलोचना सुरु भएको छ । ‘बाबुसाहेव’ नामक चलचित्रमा नराम्ररी डुबेपछि पति विनोद मानन्धरलाई रुवाएर उनी अमेरिका भासिएकी थिइन् । यस्तै, नयाँ शक्तिका अर्का अभियन्ता भनिएका सरोज खनाल पनि अमेरिकाको ग्रीन कार्ड होल्डर व्यक्ति हुन् । अमेरिकाको बेकरी पसलमा काम गर्दा गर्दै ग्रीन कार्ड लिएका खनालले नेपालको हित नगर्ने भन्दै चलचित्र क्षेत्रमा नै उनको आलोचना भएको छ ।
राज्यकोषमा दोहन गर्नेहरु पनि
नयाँ शक्तिको अन्तरिम परिषद्मा रहेका रामेश्वर खनाल नक्कली भ्याट बिलमा फसेका व्यापारी तथा अवैध धन्दा गर्नेलाई चोख्याउने मध्येका एक हुन् । कृष्णहरि बास्कोटा र खनालले नक्कली धन्दा गर्ने र फर्जी भ्याट बिल बनाउनेलाई छुट दिएर करोडौं कमाएको भन्दै अहिलेसम्म पनि अर्थ मन्त्रालयमा चर्चा हुने गरेको छ । खनालले तीन हाजर बढी व्यापारीलाई नक्कली भ्याट बिल प्रकरणमा उन्मुक्ति दिएका थिए । सधैं नेपाली काँग्रेसको नजिक रहेर राज्यकोषबाट तर मारेका खनालसँग कुन विचार छ, कुन योजना र कुन सिद्धान्त छ त ? चौतर्फी प्रश्न गर्न थाविलएको छ । अर्थमन्त्रायका एक उच्च अधिकारी कालोलाई सेतो र सेतोलाई कालो बनाउने क्षमता मात्रै उनीसँग रहेको बताउँछन् ।

यस्तै, हरेराम कोइराला ऊर्जा मन्त्रालयमा बसेर ऊर्जा दलालको भलाइमा काम गरेका व्यक्ति हुन् । माथिल्लो ‘त्रिशुली थ्री ए’को क्षमता बढाउन उनले राम्रै जोडबल गरेका थिए । त्यसबापत रु पाँच अर्ब लिने उनको योजना थियो । उनी ऊर्जा सचिव हुँदा ऊर्जा क्षेत्रमा सबैभन्दा बढी वेथिति भित्रिएको थियो । भारतीय दलाल र कमिसनखोरहरुलाई नेपालको जलस्रोत सुम्पनमा उनको ठूलो हात रहेको ऊर्जा मन्त्रालयका उच्च अधिकारी आज पनि स्मरण गर्छन् ।
यस्तै, प्रवीण मिश्र स्वास्थ्य तथा जनसंख्या मन्त्रालयमा रहँदा उनले गरेको भ्रष्टाचार र अनियमितताको खात हेर्न टंगालमा रहेको अख्तियार दुरुपयोग अनुसन्धान आयोग पुगे हुन्छ । नक्कली औषधिको बिल बनाउनेदेखि नेपाली औषधि उद्योगलाई डुबाउने योग्यता नै उनको प्रमुख सम्पति हो ।
गणेशराज राई नेपाल प्रहरीका उच्च अधिकारी हुन् । उनले सडकमा बस्ने ट्राफिक प्रहरीसँग सेटिङ मिलाएर घुस खाने गरेको आरोप उतिबेलै लागेको थियो । यातायात मजदुर तथा व्यावसायीलाई रुवाएर कमाउ धन्दा गर्ने र आफूभन्दा माथि रहेकाको चाकडी गर्ने उनको राम्रो योग्यता नेपाल प्रहरीमा चर्चा हुने गरेको छ ।
कमला हेम्चुरी, चैतन्य सुब्बा, दुर्गा सोब, पासाङ शेर्पा यस्ता व्यक्ति हुन् जसमाथि गैरसकारी संस्था चलाएर मुलुकलाई खोक्रो बनाएको आरोप लाग्दै आएको छ । उनीहरु जनताभन्दा पनि दातालाई रिझाउन सक्ने काममा विशेष दक्षता राख्छन् ।
दुई मुलुकको नागरिकता धारी पनि
दुईवटा नागरिकता बोकेको भन्दै एमालेभित्रै आलोचना भएपछि एमाओवादी छिरेका र हाल भट्टराईको मधेस कमाण्डर भनिएका रामचन्द्र झाको बारेमा थप जान्न चाहँदा रघुवीर महासेठलाई सोध्दा हुने धनुषावासीको धारणा छ । भारत र नेपालको दुई वटै नागरिकता बोकेर हिँड्ने उनको योग्यताका बारेमा प्रचण्डलाई भन्दा बढी डा. भट्टराई नै जानकार रहेको धनुषाका माओवादीको तर्क छ ।
मोहनी महर्जन, ऋषवदेव भट्टराईको कुनै राजनीतिक क्षमता छैन भने कमला हेम्चुरीको एनजिओ चलाएको राम्रो अनुभव छ । केशव दाहाल, टीका गौचनलाई समाजले राम्रो नमान्ने बताइन्छ । डम्बर खतिवडा पूर्व माले हुन् । एमालेमा नअटाएका खतिवडा पछिल्लो समय ब्लग लेखेर बसेका थिए ।
तिलक थापामगर, दलमर्दन कामी, नत्थुप्रसाद चौधरीलाई कसैले चिन्दैन भने पूर्वमाओवादी देवेन्द्र पौडलले युद्धकालमा सुन लुकाएको आरोपबाट आजसम्म सफाई पाएका छैनन् । नयाँ शक्तिको अन्तरिम परिषद्मा राखिएका नारायण पाण्डे, मदन राई, मनप्रसाद सुनुवार, वज्रकिशोर यादव विसन राई, डा. सुरेन्द्र चौधरीको कुनै योग्यता र क्षमता नभएको स्वयं रामेश्वर खनालको भनाइ छ । आजको जनआह्वान साप्ताहिकमा खबर छ ।