काठमाडौं, पुष २४ । प्रधानमन्त्री तथा पार्टीको संसदीय दलको नेतासमेत रहेका एमाले अध्यक्ष केपी ओलीले एकलौटी निर्णय गर्ने गरेको भन्दै एमालेभित्र असन्तुष्टि फेरि चुलिएको छ । मंगलबार स्थायी समिति सदस्य सुवास नेम्वाङलाई दलको उपनेता बनाएपछि पुन: असन्तुष्टि सुरु भएको हो । व्यक्ति छनोट ठीक भए पनि छनोटको प्रक्रिया गलत गरी नेम्वाङलाई उपनेता बनाइएको भन्दै पदाधिकारीले नै असन्तुष्टि जनाएका छन् । पार्टीभित्र छलफल नै नगरी माधव नेपाल, झलनाथ खनाललगायतका फरक खेमाका नेताहरू उपस्थित नै नभएको संसदीय दलको बैठकबाट नेम्वाङलाई उपनेता बनाइएको थियो ।
एमालेका तर्फबाट ९ पुसमा ६ राज्यमन्त्री बनाउँदा पनि प्रधानमन्त्री ओलीले एकलौटी गरेको भन्दै माधवकुमार नेपाल समूह असन्तुष्ट भएको थियो । नियुक्त गर्नुअघि ‘राज्यमन्त्रीबारे छलफल गर्नु छ’ भन्दै ओलीले बालुवाटार बोलाएर दुई घन्टा कुराएपछि नेता नेपाल रिसाएर हिँडेका थिए । त्यसपछि ओलीले टेलिफोनमै नेपालसँग राज्यमन्त्री नियुक्तिका विषयमा कुरा गरेका थिए । तर, नेपालले सिफारिस गरेका कसैलाई पनि राज्यमन्त्री नबनाएको नेपाल पक्षको आरोप छ ।
प्रधानमन्त्री भएपछि ओलीले पहिलोपटक गरेको मन्त्रिपरिषद् विस्तारलाई लिएर पनि एमालेभित्र विवाद भएको थियो । शीर्ष नेताहरूबीच भएको समझदारीविपरीत प्रधानमन्त्री ओलीले अग्नि खरेललाई कानुनमन्त्री बनाएपछि ओलीनिकट नेताहरूले नै पनि सार्वजनिक रूपमा असन्तुष्टि जनाएका थिए ।आजको नयाँ पत्रिका दैनिकमा खबर छ ।
f
No comments:
Post a Comment