बार्सिलोना बराबरीमा रोकियो

एजेन्सी,मंसिर २७ । स्पेनिस ला लिगा फुटबलमा शीर्ष स्थानमा रहेको बार्सिलोना डिप्रोटिभो डी ला कोरुनासँग बराबरीमा रोकिएको छ । शनिबार राति भएको खेलमा बार्सिलोनालाई डिप्रोटिभो डी ला कोरुनाले २–२ को बराबरीमा रोकेको हो । ३९ औं मिनेटमा लियोनल मेस्सीले बार्सिलोनालाई सुरुवाती अग्रता दिलाएपनि खेलको ६२ औं मिनेटमा इभान रेकिटिकले बार्सिलोनाको अग्रता दोब्बर पारे । २–० ले पछि परेको अवस्थामा ला कोरुनाले अन्तिम १४ मिनेटमा दुई गोल गर्दै बार्सिलोनालाई बराबरीमा रोक्यो । ७७ औं मिनेटमा पेरेज मार्टिनेजले ला कोरुनाका लागि पहिलो गोल गरे भने ८६ औं मिनेटमा बरगेन्टिनोज गार्सियाले गोल गर्दै खेल २–२ को बराबरीमा ल्याए । बराबरीपछि पनि शीर्ष स्थानमा रहेको बार्सिलोनाको १५ खेलबाट ३५ अंक भएको छ । एक खेल कम खेलेका एथ्लेटिको मड्रिड र रियल मड्रिड ३२ तथा ३० अंकसहित दोस्रो र तेस्रो स्थानमा छन् ।