प्रहरीको गोली लागेर दुई आन्दोलनकारीको मृत्यु

सप्तरी, मंसिर ६ । सप्तरीमा प्रहरी र प्रदर्शनकारीबिच भएको झडपको क्रममा प्रहरीले चलाएको गोली लागेर दुई जनाको ज्यान गएको छ । यात्रुबाहक बसको स्कर्टिङ रोक्न भेला भएका आन्दोलनकारीहरु प्रहरीमाथि जाइलागेपछि प्रहरीले गोली चलाउदाँ उनीहरुको ज्यान गएको हो । जिल्ला प्रहरी कार्यालयका प्रहरी निरीक्षक लालध्वज सुवेदीका अनुसार गाढा-९ का वीरेन्द्र राम र जमुनी मध्यपुरमा-७ का नागेश्वर यादवको मृत्यु भएको हो। झडपपछि स्थानीय प्रशासनले सदरमुकाम राजविराजको अञ्चल प्रहरी कार्यालयबाट नगर प्रहरी कार्यालयसम्म तथा रुपनी र भारदहमा कर्फ्यु लगाएको छ । मोर्चाको आह्वानमा झण्डै तीन महिनादेखि दिउँसो बन्द हुँदा पूर्वमा चल्ने गाडी प्रहरीले राति स्कर्टिङ गरेर पार गराउने गरेको थियो ।