आयरल्याण्ड युरोकपका लागि छनौट

एजेन्सी, मंसिर १ । प्लेअफको दोस्रो लेगमा बोसनिया हर्जगोभिनालाई हराउँदै रिपब्लिक अफ आयरल्याण्ड युरोकप २०१६ का लागि छनौट भएको छ । सोमबार राति भएको बोसनिया हर्जगोभिनालाई २–० ले हराएको आयरल्याण्ड समग्रमा ३–१ को जित सहित युरोकपका लागि छनौट भएको हो । गएको शुक्रबार भएको पहिलो लेगमा आयरल्याण्डले बोसनिया हर्जगोभिनालाई उसकै घरेलु मैदानमा १–१ को बराबरीमा रोकेको थियो । सोमबार राति घरेलु मैदानमा भएको दोस्रो लेगमा आयरल्याण्डका लागि दुवै गोल जोन वाल्टर्सले गरे । उनले २४ औं मिनेटमा पाएको पेनाल्टीको अवसरलाई सदुपयोग गर्दै आयरल्याण्डलाई सुरुवाती अग्रता दिलाए भने ७० औं मिनेटमा दोस्रो गोल गर्दै जित सुनिश्चित गरे । खेल अवधिभर बलमा बोसनिय हर्जगोभिनाका खेलाडीको नियन्त्रण बढी रहेको भएपनि गोल गर्न नसक्दा नतिजा आयरल्याण्डको पक्षमा गयो ।