उपराष्ट्रपतिमा सत्तारूढ र प्रतिपक्षकै भिडन्त, दुई जनाको उम्मेद्वारी फिर्ता

काठमाडौं,कातिक १३ । उपराष्ट्रपति निर्वाचनमा सत्तारूढ गठबन्धनको तर्फबाट एमाओवादीका उम्मेद्वार नन्दकिशोर पुन पासाङ र कांग्रेसका समानुपातिक सांसद् अमियकुमार यादव एक आपसमा भिड्ने भएका छन् । नेपाल परिवार दलका दयाराम कँडेल र स्वतन्त्र सांसद अतहर कमाल मुसलमान उपराष्ट्रपति पदका लागि दिएको उम्मेदवारी फिर्ता लिएसँगै यी दुईको भिडन्त हुन लागेको हो ।

यसअघि चार जनाले उम्मेद्वारी दिएका थिए । तत्कालीन माओवादीका लडाकु कमाण्डर रहेका पुनलाई उपराष्ट्रपति पदमा जिताउन नेकपा एमालेका वरिष्ठ नेता झलनाथ खनाल प्रस्तावक बसेका छन् भने राप्रपा नेपालका सचेतक दिलनाथ गिरी र मधेशी जनअधिकार फोरम लोकतान्त्रिकका सांसद् योगेन्द्र चौधरी समर्थक बसेका छन्। सांसद्हरुले शनिबार विहान ११ बजेदेखि २ बजेसम्म गोप्य मतदान गरेर उपराष्ट्रपति चयन गर्नेछन् । अखण्ड नेपाल पार्टीका सांसद कुमार खड्काका अनुसार अब साना ५ दलसहितका ७ भोट कांग्रेसले पाउनेछ ।