महरा सहितका माओवादी नेता भाग नपाएपछि नयाँ सरकारको कसरतमा

काठमाडौं,असार २२ । सरकार परिवर्तनका लागि पहल गर्ने जिम्मा माओवादी केन्द्रले अध्यक्ष प्रचण्डलाई दिएको छ ।‘नेतापिच्छे नै फरक अभिव्यक्ति दिँदा वातावरण बिग्रन सक्ने ठानी पहलकदमी गर्न अध्यक्षलाई जिम्मेवारी दिइएको हो ।

अन्य नेताहरूबाट भने भित्री वातावरण निर्माणको काम भइरहेको छ,’ माओवादी केन्द्रका एक नेताले भने, ‘एमालेसँगको सत्ता सहकार्य पार्टी एकता वा संयुक्त मोर्चा निर्माणको अवधारणाका रूपमा जानुपथ्र्यो तर, त्यसो नहुने, संसदीय व्यवस्थाभित्रै रहने र अलग पार्टी अवधारणामा रहने हो भने यो गठबन्धनले माओवादीलाई घाटा पुर्‍याउने देखेपछि हामी गठबन्धन लम्ब्याउन नहुने निष्र्कषमा पुगेका हौ ।’

भित्री रूपमा नयाँ सत्ता गठबन्धन निर्माणको वातावरण बनाउन कृष्णबहादुर महरा, वर्षमान पुन, जनार्दन शर्मालगायत नेताहरू सक्रिय छन् । आजको नयाँ पत्रिका दैनिकमा समाचार छ । दोस्रो पुस्ताका ती नेताले अहिले विश्वास दिलाउन कांग्रेसका दोस्रो पुस्ताका नेता तथा मधेसी नेतासँग भेटघाट बाक्लो बनाएका छन् । सत्तारूढ दलभित्रै असन्तुष्ट नेताहरूसँग पनि उनीहरूले भेटघाट गरेका छन् ।

त्यस्ता भेटघाटमा सहभागी एक नेताले भने, ‘आइतबार पनि सत्तामा रहेका र बाहिरका मधेसी दलका नेताहरूसँग दुई–तीन राउन्ड हामीले छलफल गरेका छौँ ।’ केन्द्रका नेताहरूले फोरम लोकतान्त्रिकका नेता जितेन्द्रदेवसँग पनि छलफल गरेका छन्।