पर्याप्त आम्दानी गर्ने राष्ट्रिय बायुसेवा निगमको सपना चिनियाँ जहाजले उडायो

काठमाडौं,जेठ ३१ । चिनियाँ जहाज उडाएर बजार हिस्सा ओगट्दै पर्याप्त आम्दानी गर्ने राष्ट्रिय ध्वजावाहक नेपाल बायुसेवा निगमको सपना सपनामात्रै हुने भएको छ। गत बैशाखमा दुई साताभन्दा बढी थन्किएर बल्लबल्ल मर्मतपछि उडेको मोर्डन अर्क–६० (एमए–६०) सिरिजको चिनियाँ जहाज फेरि त्रिभुवन अन्तर्राष्ट्रिय विमानस्थलमा थन्किएको छ। यो जहाजको दायाँ इन्जिनमा समस्या उत्पन्न भएपछि ग्राउन्डेड भएको हो।

‘एमए–६० को दायाँ इन्जिनको इसिएस प्यानल चर्किएपछि जहाजलाई ग्राउन्डेड गरिएको छ,’सम्बद्ध स्रोतले भन्यो,‘त्यसमाथि दुई दिनपछि यो जहाजको दुई वर्षे मर्मतको तालिका पनि परेको छ र बढीमा एक महिना थन्किने छ।’

स्रोतका अनुसार जेठ २६ गते काठमाडौंबाट विराटनगर उडान गरेर फर्केपछि जहाजमा समस्या देखिएको थियो। त्रिभुवन विमानस्थलमा अवतरण भएपछि निगमका इन्जिनियरहरुले जहाज वरिपरि घुमेर हेर्दा दायाँ इन्जिनको इसिएस प्यानलमा क्र्याक देखेका थिए। त्यसपछि जहाज ग्राउन्डेड गरिएको थियो। नागरिक दैनिकमा समाचार छ।