काँग्रेस, एमाले र एमाओवादी पार्टीका नाम मधेशमा लिनु अपराध हो- अध्यक्ष महतो

सर्लाही,चैत ६ । नेपाली काँग्रेस, नेकपा एमाले र एकिकृत नेकपा माओवादी पार्टीका मधेशमा नाम लिनु अपराध रहेको सद्भावना अध्यक्ष राजेन्द्र महतोले बताउनुभएको छ । ‘मधेशी जनतासंग यी पार्टीहरुले गरेको व्यवहारले मधेशमा काँग्रेस, एमाले र एमाओवादीको नाम लिनु अपराध हो ।’– महतोले भन्नुभयो । ६ महिना सम्म चलेको मधेश आन्दोलनमा आफ्ना अधिकारका लागि मधेश जनता सडकमा आउँदा यी पार्टीहरुले टाउँको तथा छातीमा गोली हान्ने काम गरेकाले आज यो कुराले दुनियाँ चकित भएको उहाँको तर्क थियो ।
चैत १ गते देखि नै आफ्नो गृह जिल्ला सर्लाहीमा पार्टी सुदृढिकरण तथा जनजागरणमा लाग्नु भएको महतोले आज बिहान सदरमुकाम मलंगवामा पार्टीको भातृ संगठन युवा मंचका कार्यकर्तालाई सम्बोधन गर्दै यस्तो बताउनुभएको हो ।
मधेश विरोधी पार्टीमा रहेका मधेशीहरु आज गुलाम बनेर लम्पसार भएर बसेको उहाँले आरोप लगाउनुभयो । संविधान सभाको चुनावमा म पनि मधेशी हु र जातपातलाई प्रलोभन देखाई ती गुलामहरुले सर्वाधिक मत लिएर गएको तर संविधान बनाउने समयमा आफ्नो प्रभु अगाडी लम्पसार भएको र आफ्नो अधिकारका लागि सडकमा उत्रेका मधेशी जनता माथि गोली हान्ने काम भएको समयमा झन सघाएको समेत आरोप लगाउनुभयो । उहाँले आफ्नो युवा संगठनलाई पार्टी सुदृढिकरणमा लाग्न निर्देशन पनि दिनुभएको छ ।