बसको अन्तिम सीटमा सालनालसहितको मृत शिशु

स्याङजाः पोखरा-स्याङ्जा- अर्जुनचौपारी गुुड्ने मिनी बसको सिटमुनि नवजात शिशु मृत अवस्थामा फेला परेको छ । बस सफा गर्ने क्रममा बिहीवार साँझ भेटिएको मृत नवजात शिशुलाई हाल जिल्ला अस्पताल स्याङ्जामा राखिएको छ ।

अर्जुनचौपारी गाविसबाट नियमित स्याङजा हुँदै पोखरा जाने ना ५ ख ४६७८ नम्बरको मिनीबसको पछिल्लो सिटमा कालो-खैरो रंगको ज्याकेटले गुटमुटिएको अवस्थामा सालनालसहितको नवजात शिशु मृत अवस्थामा फेला परेको प्रहरी नायव निरीक्षक नारायणप्रसाद पौडेलले जानकारी दिए ।

मिनी बस बिहीवार बिहान ११ बजे पोखरा गए र साँझ फर्केको थियो । बिहान ११ बजे पोखरा जाँदा ३३ यात्रु लिएर गएको मिनीबसलाई वसपार्कमा सफा गर्दा केही नभेटिएको चालक बताउँछन् । तर, दिउँसो १५ महिलासहित ५ पुरुष यात्रु लिएर फर्केको बसमा मृत नवजात शिशुको शव भेटिएको हो ।

सबै यात्रु झरेपछि साँझ करिब ७ बजेतिर अर्जुनचौपारी–५ स्थित दरौंखोलामा धुने क्रममा बसको अन्तिम सीटमा ज्याकेटले गुट्मुटिएको अवस्थामा नवजात शिशु फेला परेपछि प्रहरीलाई खबर गरिएको हो ।

बसमा सवार सबै यात्रुबारे जानकारी लिइरहेकाले नवजात शिशुलाई बसमा छाड्ने व्यक्तिको बारेमा अनुसन्धान भैरहेको प्रहरी निरीक्षक रणबहादुर चन्दले जानकारी दिए ।

पुरुष जातिको सो नवजात शिशुको शुक्रवार शव परीक्षणपछि जिल्ला अस्पतालमा राखिएको छ ।

Source: annapurnapost.com