नेपाल टस हारेर न्युजिल्याण्ड विरुद्ध नेपाल ब्याटिङ गर्दै (लाईभ अपडेट)

काठमाडौं,माघ १४ । बंगलादेशमा चलिरहेको १९ वर्षमुनिको आइसिसी विश्वकप क्रिकेटमा समूह डी मा रहेको नेपालले न्युजिल्याण्डसँग प्रतिस्पर्धा गरिरहेको छ ।बंगलादशेको फतुल्लाहमा रहेको खान साहेब ओसमान अली रंगशालामा जारी खेलमा टस हारेर नेपाल व्याटिंग गरिरहेको छ । नेपालका सुनिल धमला १५ तथा योगेन्द्र सिंह कार्की ६ रन बनाएर आउट भएका हुन् । धमलाले तीन वटा चौका प्रहार गरेका थिए । धमलालाई न्युजिल्याण्डका स्कट बि लियोपार्डले क्याच आउट गरेका हुन् । राजु रिजाल पनि ६ रन बनाउदै आउट भएका छन् ।

यस्तै कार्कीलाई फिलिप्स पारिखले क्याच आउट गरेका हुन् । यस अघि, सन् २००६ मा भएको खेलमा नेपालले न्युजिल्यान्डलाई पराजित गर्दै प्लेट च्यापियन उपाधि जितेको थियो । त्यसैगरी नेपालले दोस्रो खेलमा शनिबार आयरल्यान्डसँग र तेस्रोमा सोमबार भारतसँग प्रतिस्पर्धा गर्नेछ ।

मलेसियामा गत अक्टोबरमा भएको आइसिसी उन्नाइस वर्षमुनिको विश्वकप छनोट प्रतियोगिताको राउन्ड रोबिन र फाइनल खेलमा नेपालले आयरल्यान्डलाई पराजित गर्दै छनोट भएको थियो । विश्वकपमा प्रत्येक समूहको शीर्ष दुईमा रहने टोली अघिल्लो चरणका लागि छनोट हुनेछन् । विश्वकपमा सहभागी हुन नेपाली टोली यही माघ ६ गते नै बङ्गलादेश प्रस्थान गरेको थियो । उक्त प्रतियोगिताको तयारीमा रहेको नेपालले यही माघ ९ र ११ गते श्रीलङ्का र पाकिस्तानसँग अभ्यास खेल खेलको थियो ।
नेपाली टोलीमा राजु रिजालले कप्तानको भूमिका निर्वाह गरेका छन् भने अरिफ शेख उपकप्तान छन् । त्यसैगरी, दिपेन्द्र ऐरी, सुशील कँडेल, सुनिल धमला, सन्दिप सुनार, सौरभ खनाल, प्रेम तामाङ, दिपेश श्रेष्ठ, राजवीर सिंह, इशान पाण्डे, योगेन्द्र कार्की, सन्दिप लामिछाने, हिमांशु दत्त, र शङ्कर राना छन् । वैकल्पिक खेलाडीमा भने इर्साद अहमद, नन्दन यादव, ललितनारायण राजवंशी र कुशल भुर्तेल छन् ।
नेपालसहित विभिन्न १६ राष्ट्रले भाग लिएको उक्त प्रतियोगितामा सहभागी टोलीलाई विभिन्न चार समूहमा विभाजन गरिएको छ । नेपाल भने समूह ‘डी’ मा परेको छ । समूह डी मा भारत, आयरल्याण्ड र न्युजिल्यान्ड छन् ।त्यस्तै समूह ए मा बङ्गलादेश, नामिबिया, स्कटल्यान्ड र दक्षिण अफ्रिका छन् भने समूह ‘बी’मा अफगानिस्तान, क्यानडा, पाकिस्तान र श्रीलङ्का छन् । समूह सी मा इङ्ग्ल्यान्ड, फिजी, वेष्ट इन्डिज र जिम्बावे छन् ।
यो प्रतियोगितामा नेपालसहित १६ टोली सहभागी छन् । चार समूहमा रहेका टोली मध्ये प्रत्येक समूहको शीर्ष दुईमा रहने टोली अघिल्लो चरणका लागि छनौट हुनेछन् । नेपालले यो खेल जिते अघिल्लो चरण प्रवेशका लागि सम्भावना बलियो बनाउने छ ।
लाईभ अपडेटको लागि यहाँ क्लिक गर्नुहोस् ।