एमाओवादीभित्र चर्काचर्की,समितिबाट नारायणकाजी श्रेष्ठको राजीनामा

काठमाडौं,माघ १४ । पार्टीबाट सरकारमा सहभागी मन्त्रीहरुको कार्यशैलीप्रति असन्तुष्टि जनाउदै एमाओवादी उपाध्यक्ष नारायणकाजी श्रेष्ठले सरकार सञ्चालन सहयोग तथा समन्वय समितिको संयोजकबाट राजीनामा दिएका छन् । उपाध्यक्ष श्रेष्ठको राजीनामा स्थायी समिति बैठकले स्वीकृतसमेत गरेको छ ।
आजको राजधानी दैनिकमा खबर छ–बैठकमा उपाध्यक्ष श्रेष्ठले मन्त्रीहरुको कार्यशैली तथा कार्य सम्पादनप्रति असन्तुष्टि जनाउदै समन्वय समितिको संयोजकबाट राजीनामा दिएको र त्यसको स्वीकृतसमेत भएको बैठकमा सहभागी एक नेताले जानकारी दिए ।
खराब काम गर्ने मन्त्रीहरुको समेत निगरानी गर्न मन्त्रीहरुले गर्ने सरुवा, बढुवालगायतका काम कारबाहीदेखि उनीहरुका दैनिक गतिविधिसमेतलाई अनुगमन गर्न एमाओवादीले समिति बनाएको थियो ।
मंगलबारदेखि जारी स्थायी समितिको बैठकमा संयोजक श्रेष्ठ र मन्त्रीहरुबिच आरोपपत्यारोप नै भएको थियो । समितिले भनेको मन्त्रीहरुले नटेरेको र श्रेष्ठको आरोप थियो भने मन्त्रीहरुले समन्वयको नाममा समितिले अनावश्यक हस्तक्षेप गर्न खोजेको दावी गरेका थिए ।