नेपालद्वारा न्युजिल्याण्डसामू २ सय ३९ रनको चुनौती

काठमाडौं,माघ १४ । बंगलादेशमा चलिरहेको १९ वर्षमुनिको आइसिसी विश्वकप क्रिकेटमा समूह डी मा रहेको नेपालले न्युजिल्याण्डसामू २ सय ३९ रनको लक्ष्य दिएको छ । बंगलादशेको फतुल्लाहमा रहेको खान साहेब ओसमान अली रंगशालामा टस हारेर पहिलो ब्याटिङ गरेको नेपालले निर्धारित ५० ओभर खेलेर सात विकेट गुमाउदै २३८ रन बटुलेको हो ।

नेपालका लागि कप्तान राजु रिजालले सर्वाधिक ४८ रनको योगदान दिए । उनले ६५ बल खेल्दा ६ चौका प्रहार गरेका थिए । आरिफ सेखले ६० बलमा ३९ बनाए । उनको इनिङमा ३ चौका सामेल थियो । राजविर सिंह ३८ बलमा २४ रन बनाएर आउट भए । सुनिल धमला १५, योगेन्द्र सिंह कार्की ६ आउट भए । राजवीर सिंह, दिपेन्द्र ऐरी र कुशल भुर्तेलले पनि महत्वपूर्ण रन बटुले । उनीहरुले क्रमशः २४, १६ र ३५ को योगदान दिएका छन् । न्युजिल्याण्डका नाथन स्मिथले तीन, क्रिष्टियन लियोपार्ड, अनिकेट पारिख, रचिन रविन्द्र तथा जोस फिन्नीले समान एक एक विकेट लिए ।