नारायणकाजीको राजिनामा अस्वीकृत,प्रचण्डको थाइल्याण्ड भ्रमण स्थगित

काठमाडौं,माघ १४ । एमाओवादीले गठन गरेको सरकार सञ्चालन समन्वय तथा सहयोग समितिको संयोजकबाट उपाध्यक्ष नारायणकाजी श्रेष्ठले बुझाएको राजिनामा स्थायी समितिले अस्वीकृत गरेको छ । अध्यक्ष प्रचण्ड निवास लाजिम्पाटमा बिहिबार बिहान पार्टी बसेको स्थायी समिति तथा पार्टीका मन्त्रीहरुको संयुक्त बैठकले श्रेष्ठको राजीनामा अस्वीकृत गरेको हो ।

स्थायी समितिको आग्रहमा श्रेष्ठले राजीनामा फिर्ता लिएको जानकारी दिँदै अब सरकार सञ्चालनको काम प्रभावकारी ढंगले गर्ने प्रतिबद्धता व्यक्त गरे । त्यस्तै अध्यक्ष प्रचण्डको थाइल्याण्ड भ्रमण स्थगित भएको छ । पार्टी संगठनको कामको व्यस्तता र मधेसमा आन्दोलनरत पक्षहरुसँग थप छलफल गर्नुपर्ने भएकाले अध्यक्षको भ्रमण स्थगित भएको हो ।

अध्यक्ष प्रचण्डले बैंककमा उपचाररत पार्टीका सचिव वर्षमान पुन अनन्तको स्वास्थ्यको बारेमा थप जानकारी लिन र उहाँलाई नेपाल ल्याउने बिषयमा त्याहाँस्थित चिकित्सकहरुसँग छलफल गर्न बैंकक जाने कार्यक्रम रहेको थियो ।