कहिल्यै मन्त्री नबन्ने कांग्रेस नेता खड्काको घोषणा

काठमाडौं,पुष २२ । कांग्रेस नेता एवम् पूर्वगृहमन्त्री पूर्णबहादुर खड्काले जीवनमा कहिल्यै मन्त्री पदमा नफर्कने घोषणा गरेका छन् । कृष्णप्रसाद भट्टराई गिरिजाप्रसाद कोइराला र शेरबहादुर देउवा नेतृत्वको सरकारमा विभिन्न समयमा विभिन्न मन्त्रालयको जिम्मेवारी सम्हालेका उनले मंगलबार सन्धीखर्कमा आयोजित कार्यकर्ता भेलालाई सम्बोधन गर्दै अब मन्त्री बन्न सांसद नलड्ने उद्घोष गरे । आजको कान्तिपुर दैनिकमा खबर छ । आठ ओटा मन्त्रालय सम्हालेका खड्काले बाहिरै बसेर विकास र आर्थिक क्रान्तिबाट देशलाई विकसित राष्ट्र बनाउन लागि पर्ने दाबी गरेका छन् । सुशील कोइरालाले प्रधानमन्त्री पदमा उम्मेदवार दिएपछि असन्तुष्ट भएर पार्टी सहमहामन्त्रीबाट राजीनामा दिएका खड्का महाधिवेशन संघारमा जिल्ला दौडाहामा हिँडेका छन् ।