अख्तियारले दिँदै दिएन लाउडाको फाइल

काठमाडौं,माघ १४ । कुनै बेला निकै चर्चित रहेको लाउडा घोटाला काण्डसँग सम्वन्धित एउटा विवरण सर्बोच्च अदालत पठाउन अख्तियार दुरुपयोग अनुसन्धान आयोगले अटेर गरेको पाइएको छ। त्यस्तो विवरण पठाउन दिइएको आदेश महिनौं बितिसक्दा पनि अख्तियारले अटेर गरिरहँदा मुद्दा किनारा लगाउन ढिलाइ भइरहेको सर्बोच्च अदालतका कर्मचारीहरुले बताएका छन् ।

अष्ट्रियाको लाउडा कम्पनीसँग जहाज भाडामा लिन गरेको विषयलाई लिएर नेपाली कांग्रेसका नेता गिरिजाप्रसाद कोइराला नेतृत्वको सरकारले ठूलो भ्रष्टाचार गरेको आरोप लगाइएको थियो । सोबमोजिम अख्तियार दुरुपयोग अनुसन्धान आयोगले तत्कालीन नागरिक उड्डयनमन्त्री तारिणीदत्त चटौत, वायु सेवा निगमका तत्कालीन कार्यवाहक अध्यक्ष हरिभक्त श्रेष्ठ, सञ्चालक सदस्यहरु तीर्थलाल श्रेष्ठ, सिद्धराज जोशी, गौरीनाथ शर्मा, विभागका कामु निर्देशक रामराज उपाध्यायसहितलाई प्रतिवादी बनाई भ्रष्टाचारको मुद्दा दायर गरेको थियो ।

अख्तियारले लाउडा कम्पनीसँग जहाज भाडामा लिँदा ३८ करोड ९७ लाख ६७ हजार ३१ रुपैयाँ निगमलाई हानी–नोक्सानी भएको दाबी गर्दै सो रकम उनीहरुबाट उठाउनुपर्ने अभियोग–पत्रमा माग गरिएको थियो । आजको नेपाल समाचारपत्रमा दैनिकमा खबर छ ।