कृष्णप्रसाद हत्याकाण्ड : छविलाललाई थुनामा राखी कारवाही गर्न आदेश

काठमाडौं,पुष ७ । गोरखाका कृष्णप्रसाद अधिकारीको हत्याका प्रमुख आरोपी छविलाल पौडेललाई थुनामा राखी कारवाही गर्न सोमबार सर्बोच्च अदालतले चितवन जिल्ला अदालतलाई आदेश दिएको छ । न्यायाधीशहरु गिरिशचन्द्र लाल र दीपकराज जोशीको संयुक्त इजलाशले तत्काल प्राप्त प्रमाणबाट पौडेलले अधिकारीको हत्या गरेको देखिएको जनाई उनलाई थुनामा राखी कारवाही गर्न आदेश दिएको नेपाल समाचारपत्र दैनिकमा समाचार छ ।
यसअघि चितवन जिल्ला अदालतले पौडेललाई २० हजार रुपैयाँ धरौटीमा छाडेको थियो । पौडेलसहित ११ जनालाई पनि चितवन जिल्ला अदालते तारखेमा छाडेको थियो । सो जिल्ला अदालतले गरेको आदेशलाई पुनारावेदन अदालत हेटौंडाले सदर गरेको थियो ।
सर्बोच्च अदालतले पौडेललाई थुनामा राखी कारवाही गर्न आदेश गरेको भए पनि अन्य ११ जना प्रतिवादीको हकमा भने तल्ला अदालतले गरेका आदेशलाई सदर गरेको छ ।