कहाँबाट चलेको छ बाबुरामको ‘नयाँ शक्ति’ ?

श्यामसुन्दर पुडासैनी- काठमाडौं, मंसिर १३ । एकीकृत नेकपा माओवादीका पूर्वनेता एवं पूर्वप्रधानमन्त्री डा. बाबुराम भट्टराईले आफ्नै निजी निवासलाई ‘हेडक्वाटर’ बनाएर ‘नयाँ शक्ति अभियान’ चलाइरहेका छन् । भट्टराईले तत्काल ललितपुरको सानेपास्थित आफ्नै निजी निवासबाटै नयाँ शक्तिको काम अगाडि बढाइरहेका छन् ।

दुई महिनासम्म देशैभर ‘नयाँ शक्ति’ को बहस चलाउने र नयाँ पार्टी गठन गर्ने भनिएकोमा नयाँ पार्टी गठनपछि मात्र केन्द्रीय कार्यालय खोल्ने अभियानको योजना छ । नयाँ शक्तिका राजनीतिक दस्तावेज विभिन्न महत्पुर्र्ण कागजात भट्टराई निवासमै रहेको र बैठकहरू त्यहीँ हुने गरेको एक अभियन्ताले बताए । ‘अहिलेसम्म हामी नयाँ शक्तिको बहस देशैभर चलाउने अभियानमा छौं, पार्टी गठन भएपछिमात्र छुट्टै कार्यालय खोल्नेछौं’, एक अभियन्ताले हिमालय टाइम्ससँग भने, ‘त्यसबेलासम्म बाबुरामजीकै निवासबाटै काम हुनेछ ।’
भट्टराईका स्वकीय सचिव विश्वदीप पाण्डेका अनुसार अहिले भट्टराई निवासमा बिहानैदेखि राति अबेरसम्म भेटघाट र छलफलका लागि नेता÷कार्यकर्ता आउने गरेका छन् । छुट्टै कार्यालय नखोल्ने तर औपचारिकता निर्वाहका लागि राजधानीमै सम्पर्क कार्यालय खोल्ने जनाइएको छ ।
नयाँ शक्तिका अर्का अभियन्ता गंगानारायण श्रेष्ठले कोटेश्वरस्थित ‘रातो झिल्को’ मासिक पत्रिकाको कार्यालयलाई सम्पर्क कार्यालयका रूपमा प्रयोग गर्दै आएका छन् । भट्टराईकी छोरी मानुषीको सम्पादनमा प्रकाशित हुँदै आएको रातो झिल्को मासिकको कार्यालयमा श्रेष्ठले कार्यकर्ता तथा अन्य नेताहरूसँग भेटघाट गर्ने गरेको कार्यकर्ता बताउँछन् ।
सोही स्थानबाट उनले देशभर कार्यकर्तालाई अभियान चलाउन निर्देशन दिने तथा अभियानको रिपोर्टिङ गर्ने गरेका छन् । श्रेष्ठले अहिल्यै कार्यालयको जरुरी नपरेको भन्दै केही समयपछि सम्पर्क कार्यालय भने खोल्न सक्ने बताए । उनले हिमालय टाइम्ससँग भने, ‘यो अभियानमा सबै नागरिक स्वतस्फूर्त रूपमा लागेका छन्, यसैले अन्य राजनीतिक पार्टीको जस्तो ठूलोे कार्यालय स्थापना गर्न जरुरी छैन, अब कुनै एक ठाउँमा सम्पर्क कार्यालय खोल्नेछौं ।’
अभियान चलाउने खर्चबारे कार्यकर्तालाई केही जानकारी गराइएको छैन । केन्द्रीय नेताहरूबाट र शुभचिन्तकबाट ऋण सहयोग गरेर खर्च चलाइरहेको श्रेष्ठको भनाइ छ । केही दिनअघि देशैभरका कार्यकर्ता राजधानीमा ल्याएर अभियान घोषणा गरिएको थियो । देशैभरबाट १ हजार तीन सय ७० प्रतिनिधि उपस्थित उक्त कार्यक्रममा जम्मा ८ लाख रुपैयाँमात्र खर्च भएको श्रेष्ठले बताए । दुई दिनसम्म खान बस्न र कार्यक्रम गर्न जम्मा ८ लाखले नपुग्ने कार्यकर्ता नै बताउँछन् । ‘खर्च अभावमा हामीले थोरै रकमबाटै गुजारा चलाउँदै आएका छौं, कार्यकर्तालाई स्वावलम्बन हुन निर्देशित गरेका छौं’, श्रेष्ठले हिमालय टाइम्ससँग भने, ‘यसैले अभियानमा लाग्नेले आफंै पनि खर्च गर्नुपर्नेछ ।’
देशैभर दुई महिने अभियान चलाउन अभियानका प्रमुख भट्टराईलगायत अन्य अभियन्ताले व्यक्तिगत रकम खर्च गर्ने गरेको र शुभचिन्तकसँग सहयोग मागिने नेताहरूले बताएका छन् । अभियानको नाममा हालसम्म बैंक खाता नभएको र कसैसँग जबर्जस्ती चन्दा असुल नगर्ने अभियानको नीति रहेको श्रेष्ठले बताए ।
नेपालमा ठूला राजनीतिक शक्तिहरूको आम्दानीको स्रोतको विषयमा पटकपटक प्रश्न उठ्ने गरेको छ । खर्चको पारदर्शितामा प्रश्न उठ्ने गरेपनि प्रमुख दलहरूले औपचारिक रूपमा आम्दानीको खास स्रोत बताउने गरेका छैनन् । सदाचार र पारदर्शिताको वकालत गरेका पूर्वप्रधानमन्त्री भट्टराईको कार्यशैलीले उनको भनाइ र गराइबीचको भिन्नता प्रष्ट पार्ला ।