सुन्धारामा गोली चल्यो, भूमीगत समूहका छोटेलाल घाईते

काठमाडौं,मंसिर १३ । राजधानीको सुन्धारामा आइतबार बिहानै गोली चलेको छ । सुन्धाराको लुम्बिनी पाहुना घरमा हतियारसहित बसेका बारा बरियारपुरका भगौडा प्रहरी छोटेलाल ठाकुरमाथि प्रहरीले गोली चलाएको हो ।भूमीगत समूहका छोटेलाल ठाकुरलाई प्रहरीले नियन्त्रणमा लिन खोज्दा प्रहरीमाथि नै फायरिङ गर्न खोजेपछि प्रहरीले ठाकुरलाई गोली हानेर नियन्त्रणमा लिएको हो ।

ठाकुरले गोली हान्ने प्रयास गरेपछि प्रहरीले हानेको गोली लागेर घाइते भएका ठाकुरको अहिले वीर अस्पतालमा उपचार भइरहेको महानगरीय अपराध महाशाखाले जनाएको छ । ठाकुरको घुँडामुनि दुई गोली लागेको छ । प्रहरीले ठाकुरबाट नेपाल प्रहरीको लोगो टाँस भएको एउटा चाइनिज पेस्तोल र अर्को एक थान कटुवा बन्दुक बरामद भएको जनाएको छ । उनी सुटर समेत हुन्। भारतमा पनि उनले आतंक मच्याउँदै आउका थिए । २०६७ सालमा हतियार लिएर फरार भएका उनले १ वर्षजति घरमै लुकाएर राखेको र पछि भारतीय नागरिक सुनिल जैसवाललाई बेचेका थिए । जैसवाल भने यसअघि बारामा पक्राउ परिसकेका छन् ।