राष्ट्रपति निर्वाचनमा एमाले बरिष्ठ नेता खनालको मत खाली !

काठमाडौं,कातिक १८ । राष्ट्रपति पदमा आकांक्षा राखेर पनि हुन नसकेका एमाले बरिष्ठ नेता झलनाथ खनालमाथि एमालेको एउटा वृत्तमा आशंका फैलिएको छ । विद्या भण्डारीलाई राष्ट्रपति बनाउने बेलामा खाली भेटिएका दुई मत उनै खनाल र उनका एक पूर्वसल्लाहकारको भएको चर्चा एमाले संसदीय दलमा रहेको बुधबार साप्ताहिकमा खबर छ ।
सांसद रामवीर मानन्धरले त ‘दुई जना पत्ता लागे, अब हेरौं तिनीहरुमाथि के कारबाही हुन्छ’ भनेर सामाजिक सञ्जालमै लेखेका छन् । तर, गोप्य मतदान भएका कारण उनीहरुले नै खाली राखेका हुन भनेर कतै पुष्टि हुने कुरा भएन् । एमालेको गत महाधिवेशनमा तटस्थ बसेर कतै पनि मत नहालेका खनालले राष्ट्रपति निर्वाचनमा पनि त्यसै गरे होलान् भनेर अनुमान गर्नुको कारण पनि त्यही हो ।