टर्कीमाथि रुसले लगायो नाकाबन्दी

एजेन्सी,मंसिर १३ । रुसी विमान खसालेको घटनाबाट चिसिएको टर्की र रुसबीचको सम्बन्ध झन् खराब हुँदै गएपछि रुसले टर्कीमाथि नाकाबन्दीको घोषणा गरेको छ । जसअनुसार टर्कीबाट आयातमा रोक लगाउनुका साथै रुसमा रहेका टर्कीको कम्पनीमाथि प्रतिबन्ध लगाउने साथै रुसमा कार्यरत टर्कीसलाई कामबाट निकालिने घोषणा रुसले गरेको छ । रुसी राष्ट्रपति भ्लादिमीर पुटिनले नाकाबन्दीको घोषणा गरेका हुन् ।

नाकाबनदीको घोषणा सँगै दुई देशबीच हुँदै आएको चार्टर उडान पनि नहुने भएको छ । रुसमा टर्कीका ९० हजार नागरिक कुनै न कुनै ब्यबसायमा आवद्ध छन् भने तीनका परिवारको संख्या दुई लाख रहेको बताइन्छ । यसैबीच टर्कीका राष्ट्रपति तायीप एर्दोगानले रुसले लगाएको नाकाबन्दी अमानवीय भन्दै दुःख ब्यक्त गरेका छन् । उनले रुससँग नझुक्ने अडान लिएका छन् ।

यो नाकाबन्दीको असर टर्कीमा मात्रै नभएर रुसमा पनि पर्नेछ । रुसमा २० प्रतिशत तरकारी टर्कीबाट आउने गरेको छ । टर्कीले यो बर्ष मात्रै रुसलाई एक अर्ब पाउण्ड बराबरको खाद्य सामग्री उपलब्ध गराएको थियो । टर्कीको हवाई क्षेत्रमा रहेको रुसी बिमान टर्कीले खसालेपछी टर्की र रुसबीचको सम्बन्ध चिसिएको बताइदैं आएको छ ।