साफ च्याम्पियनसिपको फितलो तयारी

काठमाडौं,मंसिर १५ । नेपाली फुटबलका लागि सर्वाधिक महत्वको प्रतियोगिता साफ च्याम्पियनसिप सुरु हुन तीन सातामात्र बाँकी छ। तर नेपाली टोलीको तयारी भने औपचारिकतामा सीमित बनेको छ। प्रशिक्षक प्याट्रिक एसम्सको प्रशिक्षणमा नेपाली टोली अहिले बिहान र बेलुका दुईपटक प्रशिक्षण गरिरहेको छ। दसैंअघि तयारी सुरु गरेको नेपाली टोलीले अहिलेसम्म कुनै पनि बलियो टोलीसँग अभ्यास खेल खेल्ने अवसरसमेत पाएको छैन।
एन्फा कम्प्लेक्स मैदानमा आफैं तयारी गरिरहेको राष्ट्रिय टोलीका लागि अखिल नेपाल फुटबल संघ (एन्फा) ले भारत जानुअघि नेपालकै ‘ए’ डिभिजन क्लबसँग केही अभ्यास खेल खेलाउने तयारी गरेको छ।यसअघिका संस्करणमा सहभागी हुनुअघि विभिन्न वैदेशिक प्रशिक्षण र बलिया टोलीसँग अन्तर्राष्ट्रिय मैत्रीपूर्ण खेल खेलेको नेपालका लागि यस पटकको तयारी आफैंमा कमजोर देखिएको अन्नपूर्ण पोष्टमा समाचार छापिएको छ ।

राष्ट्रिय टोलीको प्रशिक्षण सुरु हुनासाथ टोलीका कप्तान सागर थापा र उपकप्तान सन्दीप राईसँगै पाँचजना खेलाडी खेल मिलेमतोको आरोपमा पक्राउ पर्नु र एन्फाका अध्यक्ष गणेश थापामाथि विश्व फुटबल महासंघ (फिफा) को अनुशासन समितिले १० वर्षे प्रतिबन्ध र करिब २० लाख रुपैयाँ जरिबाना गरेपछि पछिल्लो समय नेपाली फुटबल विवादै विवादमा घेरिएको छ । नेपाली टोलीको तयारीमा समेत यी विवादले प्रत्यक्ष असर पारेको छ।

नेपाली फुटबल टोलीले यसअघिका संस्करणमा पाएको तयारी र सुविधाका हिसाबले यसपटकको तयारीमा निकै कमजोरी रहेको एन्फाकै पदाधिकारी बताउँ छन्। ‘हामीले खेलाडीलाई सक्दो अभ्यास गराउँदै आएका छौं। विगतको जस्तो वैदेशिक प्रशिक्षण र मैत्रीपूर्ण खेल नभए पनि आन्तरिक रूपमा खेलाडीको तयारी भइरहेको छ।

साफको एक साताअघि नेपाली टोलीलाई भारतमै लगेर स्थानीय क्लबसँग अभ्यास गराउनेछौं। तर वैदेशिक खेल खेल्ने नखेल्ने विषयमा तय भइसकेको छैन’, एन्फाका प्रमुख कार्यकारी अधिकृत इन्द्रमान तुलाधरले भने।

तुलाधरले हाल एन्फाका कार्यवाहक अध्यक्ष नरेन्द्र श्रेष्ठ र महासचिव धीरेन्द्र प्रधान ‘एएफसी वार्षिक अवार्ड’ का लागि भारतमै रहेकाले उनीहरू फर्किएपछि भारतमा हुने तयारीका बारेमा निर्णय लिइने बताए। च्याम्पियनसिपको तयारीमा अहिले २६ जना खेलाडी बन्द प्रशिक्षणमा छन्।

टोलीमा पहिलो पटक युवा खेलाडीको वर्चस्व रहेको छ। टोलीका प्रभावशाली स्ट्राइकर भरत खवास चोटका कारण खेल्न नसक्ने भएका छन् । अर्का स्ट्राइकर विमल घर्तीमगरसमेत सामान्य घाइते छन्। खेल मिलेमतोको आरोपमा धरौटीमा छुटेका सागर र सन्दीपलाई एन्फाले मुद्दाको किनारा नलागेसम्म निलम्बन गरेको छ। यसको असर नेपालको रक्षापंक्तिमा समेत पर्नेछ। प्रशिक्षक प्याट्रिकले अन्तिम टोलीको घोषणा भारत जानुअघि गर्ने बताइएको छ। साफ च्याम्पियनसिप भारतको केरलामा डिसेम्बर २३ देखि जनवरी ३ तारिखसम्म आोजना हुँदैछ। प्रतियोगितामा नेपाल समूह ‘ए’ मा परेको छ।

नेपालकै समूहमा रहेको पाकिस्तानले एक साताअघि मात्र च्याम्पियनसिपमा भाग नलिने निर्णय गरेको छ। समूह ‘ए’मा अब नेपालसँगै भारत र श्रीलंकाबीच प्रतिस्पर्धा हुनेछ।समूह ‘बी’ बाट भने बंगलादेश, माल्दिभ्स, साबिक विजेता अफगानिस्तान र भुटानले प्रतिस्पर्धा गर्नेछन्।

समूहका शीर्ष दुई टोली प्रतियोगिताको सेमिफाइनलमा प्रवेश गर्नेछन्। नेपालले समूहको पहिलो खेल डिसेम्बर २३ तारिखमा श्रीलंकासँग खेल्नेछ। खेल तालिकामा नेपालको दोस्रो खेल डिसेम्बर २५ मा पाकिस्तानसँग परेको थियो। नेपालले समूहको अन्तिम खेल भने २७ तारिखमा भारतसँग खेल्नेछ। च्याम्पियनसिपमा उपाधिविहीन बनेको नेपाल यसअघिका दुवै संस्करणमा सेमिफाइनलसम्म पुगेको थियो।