लिसेस्टर सिटी उपाधि नजिक,फेरि ८ अंकको अग्रता

एजेन्सी,बैशाख १३ । इंग्लिस प्रिमियर लिगको शीर्ष स्थानको लिसेस्टर सिटी उपाधि नजिक पुगेको छ । आइतबार राति भएको खेलमा स्वान्सी सिटीलाई ४–० ले हराउदै ८ अंकको अग्रता निकाल्दै उपाधि नजिक पुगेको हो । लिसेस्टर सिटीले खेलको १० औं मिनेटमा रियाद महरेजले गोलबाट सुरुवाती अग्रता लिएको थियो । खेलको ३० औं मिनेटमा लियोनार्डो युलोएले गोल गर्दै लिसेस्टर सिटीको अग्रता दोब्बर पारे।

पहिलो हाफमा २–० को अग्रता लिएको लिसेस्टर सिटीले दोस्रो हाफमा थप दुई गोल गर्यो। ६० औं मिनेटमा युलोएले व्यक्तिगत दोस्रो तथा ८५ औं मिनेटमा मार्क अलब्रिङटनले गोल गरेपछि लिसेस्टर ४–० ले विजयी भयो । जितपछि लिगका तीन खेल बाँकी हुँदा लिसेस्टरको ७६ अंक भएको छ । एक खेल कम खेलेको टोटनह्यामको ६८ अंक छ । ३५ खेलबाट ४० अंक जोडेको स्वान्सी १५ औं स्थानमा छ ।