पेट्रोलियम पदार्थको आयात बढ्यो,लाइन घटेन

काठमाडौं,बैशाख १६ । नेपाल आयाल निगमले यो साता भारतबाट पेट्रोलियम पदार्थको आयात साबिकको भन्दा झन्डै दोब्बर गरेको जनाएको छ। निगमले काठमाडौं उपत्यकामा पेट्रोलको आपूर्ति पनि साबिकको भन्दा दोब्बरले नै बढाएको दाबी गरेको छ। तर, निगमले आयात र आपूर्ति दोब्बर पारेको बताए पनि पेट्रोल पम्पमा सर्वसाधारणको लाइन बढिरहेको छ।

आयात साविक भन्दा बढी
भारतबाट दैनिक सरदर १२ लाख लिटर पेट्रोल आयात हुन्छ। तर, बजारमा लाईन बढेका कारण आयल निमगले अहिले दैनिक १४ लाख लिटर आयात पेट्रोल आयात गरिरहेको निगम प्रवक्ता मुकुन्द घिमिरेको दाबी छ। निगमले डिजेल पनि साविक भन्दा बढी आयात गरिरहेको जनाएको छ। ‘सामान्य अवस्थामा डिजेल दैनिक २७ लाख लिटर आयात भइरहेको थियो’ उनले भने, ‘बजारमा अस्वभाविक माग बढेपछि डिजेल पनि दैनिक ३५ लाख लिटर आयात भइरहेको छ।’

दुई दिन आयात प्रभावित हुँदा समस्या
अघिल्लो बुधवार र बिहीवार राक्सौलस्थित इण्डीयन आयल कर्पोरेशन (आईओसी)को डिपोबाट आयात हुन सकेको थिएन। उक्त डिपोमा भएको दुई ओटा भण्डारण टयांकमध्ये एउटामा वार्षिक सरसफाई (एन्यूल क्लिनिङ) चलाईएको थियो।
जसका कारण बुधवार आईओसीले मागभन्दा आधा अर्थात झण्डै ६ लाख लिटर पेट्रोल मात्रै उपलब्ध गराएको थियो। त्यस्तै, डिपोमा पर्याप्त पेट्रोल नभएका कारण बिहीवार भने आईओसीले रक्सौल नाकाबाट कति पनि पेट्रोल उपलब्ध गराएन। दुई दिन आयात प्रभावित हुादा उपत्यकामा पेट्रोलको अभाव देखिएको उनले बताए।

अनावश्यक स्टक राख्न थालियो
सर्वसाधारणले अनावश्यकरुपमा पेट्रोलियम स्टक राख्न थालेको निगम र व्यवासायीको दाबी छ । जसका कारण पेट्रोल पम्पमा बढी लाईन देखिएको उनीहरु बताउँछन्। ‘सर्वसाधारणमा मनोवैज्ञानिक त्रास बढेको छ’ घिमिरेले भने, ‘एक दिन आयातमा प्रभावित हुने वित्तिकै सर्वसाधारणले अनावश्यकरुपमा स्टक राखी हाल्छन्।’

सार्वजनिक विदाका दिन पेट्रोल नदिँदा समस्या
व्यवसायीका अनुसार लगातार दुई दिन सार्वजनिक विदा परेका समयमा सधै पेट्रोलको अभाव हुने गरेको छ। निगमले सार्वजनिक विदाका दिन पेट्रोल विक्री गर्दैन। तर, बजारमा सर्वसाधारणले भने सार्वजिनक विदाका दिन पनि साविककै झै पेट्रोल खरीद गर्छन्। यसले गर्दा बेला बेला पेट्रोलको अभाव देखिने गरेको पेट्रोलियम डिर्स एसोसिएसनका अध्यक्ष लिलेन्द्र प्रधानको भनाई छ। नयाँ पत्रिका दैनिकमा समाचार छ।