सर्वदलीय बैठकमा प्रम ओलीको तीन प्रस्ताव,मान्लान त प्रतिपक्षीले ?

काठमाडौं,बैशाख १८ । प्रधानमन्त्री केपी शर्मा ओलीको आह्वानमा भएको सर्वदलीय बैठकमा ओलीले संसद अधिवेशन, पुनर्निर्माण र मधेस समस्याका विषयमा राय सुझाव लिएका छन्। शनिबार बिहान सिंहदरबारमा बसेको बैठकमा बजेट अधिवेशनको तयारीका साथै, भूकम्पपछिको पुनःनिर्माण महाअभियानमा दलले परिचालन गर्ने स्वयमंसेवक र समसामयिक विषयमा बैठकमा छलफल गरेका हुन्।

प्रधानमन्त्रीले बोलाएको छलफलमा मधेसकेन्द्रित दलहरु बाहेक संसदमा प्रतिनिधित्व गर्ने अधिकांश दल सहभागी भएका थिए। बैठकमा प्रधानमन्त्रीले जेठ पहिलो हप्तामा स्वयं सेवक परिचालन गरेर पुनर्निर्माणलाई गति दिने, संसद अधिवेशनमा नीति तथा कार्यक्रम र बजेटपूर्वको छलफल सुरु गरिहाल्ने र मधेसमा देखिएको समस्यालाई राष्ट्रिय मुद्दाको रुपमा लिइ मधेसवादी दलहरुसँग वार्ता गर्ने प्रस्ताव गरेका थिए।

पुर्ननिर्माण कार्यका लागि सरकारले हालै १३ सय ४६ प्राविधिकलाई भूकम्प प्रभावित जिल्ला र गाउँ गाउँमा खटाएको छ। उनीहरूको कामलाई अझ प्रभावकारी बनाउन भन्दै प्रमुख प्रतिपक्षी दल नेपाली कांग्रेसले आफ्ना स्थानीय कार्यकर्ता परिचालन गर्ने निर्णय गरिसकेको छ । संसद्को बैठक यही वैशाख २१ गतेका लागि आह्वान गरिएको छ।