प्रधानमन्त्री भन्छन्-‘नाकाबन्दी आफै लाग्यो,एक दुई दिन भित्रमै आफै खुल्छ’

काठमाडौं,माघ १२ । प्रधानमन्त्री केपी शर्मा ओलीले एकदुई दिन भित्रमै नाकाबन्दी खुल्ने बताएका छन्। प्रधानमन्त्री निवास बालुवाटारमा दैनिक पत्रिकाका सम्पादक तथा बरिष्ठ पत्रकारहरुसँग छलफल गर्दै ओलीले मधेसी मोर्चाले राखेका अधिकांश मागहरु पुरा भइसकेकोले अब आन्दोलन गरिरहन आवश्यक नरहेको बताउँदै केहीदिनमै नाकाबन्दी खुल्ने दाबी गरेका हुन्। तराई–मधेशमा आन्दोलनरत दलप्रति संकेत गर्दै ओलीले भने, ‘नाकाबन्दी आफै लाग्यो, आफै खुल्छ ।

केही दिनभित्र खुल्छ ।’ संविधान संशोधनपछि अब विस्तारै मुलुक सहज अवस्थामा फर्किन लागेको बताए । ओलीले भने, ‘म मित्रहरुको मित्रतामा विश्वास गर्छु। राजनीतिक दलहंरुको इमान्दारीतामा विश्वास गर्छु। मलाई पनि नाकाबन्दी खुल्नेबारे जुन विश्वास दिलाइएको थियो। विगतमा त्यसमा ठेस लागेकै हो।’ उनले मुलुकको अवस्था सामान्य भएपछि मात्रै आफू भारत जाने उनले बताए।