साफ च्याम्पियनसिपमा भारत र माल्दिभ्स तथा अफगानिस्तान र श्रीलंका भिड्दै

काठमाडौं,पुष १६ ।  साफ च्याम्पियनसिप फुटबलको सेमिफाइनल खेलहरु आज हुँदैछन् । फाइनल प्रवेशका लागि आयोजक भारतले माल्दिभ्स तथा डिफेन्डिङ च्याम्पियन अफगानिस्तानले श्रीलंकासँग प्रतिस्पर्धा गर्ने छ । समुह चरणमा शत प्रतिशत विजयी नतिजा निकाल्दै समुह विजेता बनेको अफगानिस्तानले उपाधिको मुख्य दावेदार टोली हो । भारत र माल्दिभ्सबिचको पहिलो सेमिफाइनल खेल त्रिवेन्द्रम रंगशालमा नेपाली समय अनुसार दिउँसो पौने चार बजेपछि सुरु हुनेछ ।

अफगानिस्तान र श्रीलंकाबिचको खेल बेलुका पौने सात बजेपछि त्रिवेन्द्रम रंगशालामै हुनेछ । नेपाल रहेको समूह ए बाट भारत समूह विजेता तथा श्रीलंका उपविजेता बनेर सेमिफाइनलमा पुगेका हुन् । यस्तै समूह बी बाट अफगानिस्तान समूह विजेता तथा माल्दिभ्स उपविजेताको रुपमा सेमिफाइनलमा पुगेका हुन् ।
नेपाल, बंगलादेश र भुटान भने समूह चरणबाटै बाहिरिए । नेपाल र भुटानले प्रतियोगिताका एउटा पनि खेल्न जित्न सकेनन् । बंगलादेशले भने समूहको अन्तिम खेलमा भुटानलाई हराएको थियो । अफगानिस्तान लागि यो अन्तिम साफ च्याम्पियनसिप हो । आगामी वर्षहरुमा अफगानिस्तानले दक्षिण एशिया छोडी मध्य एशीयाली समुहबाट खेल्नेछ ।