काठमाडौं,मंसिर १३ । महानगरीय प्रहरीपरिसर काठमाडौंको अपरेसन इन्चार्ज डीएसपी रेवती ढकालले आफ्नो अख्तियारीको दुरुपयोग गर्दै काठमाडौँ परिसर मातहतका प्रहरी युनिटहरुबाट ग्यासमा आफ्नो कोटा माग्ने गरेको रहस्य सार्वजनिक भएको छ । स्रोतका अनुसार डीएसपी ढकालले काठमाडौँ परिसरमातहतका प्रहरी वृत्त, प्रभाग तथा प्रहरीबिटका इन्चार्जहरुलाई उर्दी जारी गर्दै तिमीहरुको एरियामा ग्यास आयो भने मलाई २÷३ वटा ग्यास जसरी भए पनि राखिदिनु भन्दै उर्दी जारी गर्ने गरेकाले इन्चार्जहरु आतंकित भएको स्रोतको दाबी छ । आजको जनमञ्च साप्ताहिकमा खबर छ ।
डीएसपी ढकालको ग्यास कोटाले हैरान काठमाडौँको एक प्रभागका इन्चार्जले नाम नछाप्ने शर्तमा भने, “मैले एक महिनाको अवधिमा आठवटा ग्यास दिइसकेँ, तैपनि उहाँले अझै ४÷५ वटा जसरी भए पनि मिलाइदे भन्दै दबाब दिइरहनुभएको छ, ग्यास हामीले उत्पादन गर्ने होइन, सर्वसाधारणलाई वितरण गर्नको लागि आएको ग्यासमध्ये सबैलाई कन्भिन्स गरेर मिलाइदियो, जति मिलाइदियो त्यति माग बढ्दै गएको छ, अपरेसन इन्चार्ज हुन् ग्यास मिलाउन सक्दिनँ भन्यो भने भोलिदेखि पेल्न सुरु गर्छन्, कसरी जागिर खानु र ?’
स्रोतका अनुसार पछिल्लो एक महिनाको अवधिमा उर्दी जारी गरेर काठमाडौंका विभिन्न ठाउँबाट करिब ५० सिलिन्डर ग्यास लगिसकेका छन् । स्रोतका अनुसार ग्यास लिन उनी आफू जाँदैनन्, उनले आफ्ना सहयोगीहरुमार्फत विभिन्न उच्च ओहोदाका व्यक्तिहरुको घरमा ग्यास पठाएर चाकडी गर्ने गरेको काठमाडौं प्रहरीपरिसर स्रोतको दाबी छ । महानगरीय प्रहरी वृत्त दरबारमार्गका डीएसपी रमेश बस्नेतको सरुवाको समय भइसकेको कारण उक्त वृत्तको इन्चार्ज हुने दाउ रच्दै उनले गृहमन्त्री शक्ति बहादुर बस्नेतको आफन्तहरुकोमा ग्यास पु¥याएर चाकडी गरेको समेत स्रोतको दाबी छ । २०५१ भदौ १६ मा प्रहरी सहायक निरीक्षकबाट सेवा प्रवेश गरेका उनी २०५४ चैत १८ मा प्रहरी निरीक्षकमा नाम निकाल्न सफल भएका थिए । करिब तीन वर्ष प्रहरी सहायक निरीक्षकमा जागिर खाएका उनले पछिल्लो समय आफ्नो जागिरमा प्रहरी सहायक निरीक्षकमा खाएको अवधि जोड्न नपाइने हास्यास्पद तर्क गर्दै एआईजी गणेश राईसँगै जागिर अवधि लम्ब्याउन सर्वोच्च अदालतमा रीट दर्ता गराएका छन् ।
No comments:
Post a Comment